Thursday, December 31, 2009

நாளை மற்றுமொரு நன்னாளே..




புத்தாண்டு என்றதும் நினைவுக்கு வரும் பல விசயங்களில் முக்கியமானது "நாட்காட்டி".

ஆதி காலந்தொட்டே "காலத்தை கணக்கிடுதல்" என்பது பல்வேறு முறைகளில் செய்யப்பட்ட போதும் தற்போது நாம் பயன்படுத்தும் "கிரிகோரியன்" காலண்டர்கள்(GRIGORIAN METHOD) நடைமுறைக்கு வந்த பின்புதான் உலகம் முழுவதும் ஒரு ஒழுங்கான நடைமுறையில் இயங்கத்துவங்கியது.

சிறுவயதில் காலண்டர் ஒரு ஆச்சர்யமான ஒரு பொருள்.. வீட்டிலிருக்கும் எல்லா பெரியவர்களும் அடிக்கடி பல்வேறு காரணங்களுக்காக காலண்டரை எடுத்து பார்க்கும் போதெல்லாம் நாமும் பெரியவராகும் போது தான் அடிக்கடி அதை பயன்படுத்த முடியும் என்றெல்லாம் நினைத்ததுண்டு. காலண்டர்களில் அச்சிடபட்டிருக்கும் விதவிதமான கடவுள்களின் படங்களையும், வருடம் முழுவதும் "மாறா புன்னகையுடன்" சிரித்துக்கொண்டிருக்கும் குழந்தைகளின் படங்களையும் பார்த்து ரசிப்பதே அந்தவயதுகளில் காலண்டரின் முக்கிய பயனாக இருந்தது. அந்த நாட்களில் என் வீட்டின் பக்கத்திலிருந்த 'ராகவன் மளிகை'க்கு டிசம்பர் மாத துவக்கத்திலிருந்தே விற்பனைக்கென தனி காலண்டர்களும், பல்வேறு நிறுவனங்கள் வழங்கும் இலவச காலண்டர்களும் வரத்துவங்கிவிடும்.(ராகவனின் அப்பா இலவச காலண்டர்களை புத்தாண்டிற்கு மறுதினம்தான் கண்ணில் காட்டுவார்) "சித்ரா காலண்டர்" "அம்பிகா" போன்ற புகழ் பெற்றிருந்த காலண்டர்கள் பல்வேறு வடிவமைப்புகளில் விற்பனைக்கு வரும், பெரும்பாலான காலண்டர்களில் விதவிதமான "முருகன் சிரித்து"க்கொண்டிருப்பார்.

கடிகாரத்தில் நேரத்தை சரியாக பார்த்து பழகுவதும், காலண்டரை முழுமையாக பயன்படுத்த துவங்குவதும் பள்ளிநாட்களின் சுவாரஸ்யமான காலகட்டங்களாகும். வீட்டிற்க்கு புதிதாக காலண்டர் வந்ததும் பார்க்கும் முதல் காரியம் அந்த வருடத்தின் சனி மற்றும் ஞாயிற்று கிழமைகளில் வராத அரசு விடுமுறை நாட்களை கணக்கிடுவதாகதான் இருக்கும். ஆரம்ப பள்ளிப்பருவத்தில் துவங்கிய இந்த பழக்கம் பள்ளிப்படிப்பை முடிக்கும் வரை இருந்தது.

தொண்ணூறுகளுக்கு பிறகான சமூக மாற்றத்தின் எதிரொலி காலண்டர்களிலும் பிரதிபலித்தது. தனியார் பலரும் தங்கள் தொழில் மற்றும் நிறுவன விளம்பரங்களுக்கென காலண்டர்களை பயன்படுத்த துவங்கியதும் காலண்டர்களின் முகமும், பயன்பாடுகளும் மாறத்துவங்கியது. அரசியல் தலைவர்களும், சினிமா நட்சத்திரங்களும் "அழகு முருகனையும்", புன்னகை குழந்தைகளையும் இடம்மாற்றம் செய்தனர். வாஸ்து சாஸ்திரம், எண் கணிதம் மற்றும் தினப்பலன் என ஜோசியத்தின் எல்லா பிரிவுகளும் காலண்டரில் இடம்பிடித்தது. கடிகாரம் மற்றும் காலண்டரின் வேலைகளை இன்று பெரும்பாலும் 'கை தொலைப்பேசிகள்' செய்து விடுவதால் இவற்றை பயன்படுத்தும் தேவையும் குறைந்துவிட்டது.

நாளை மீதான நம்பிக்கைகளை உயிர்ப்புடன் வைத்திருப்பதில் காலண்டர்களுக்கு முக்கியபங்கு உள்ளது, அன்பு, கோபம்.ஏமாற்றம், நம்பிக்கை என வாழ்க்கையின் அனைத்து தருணங்களும் தேதி காகிதங்களுக்குள் புதைத்து வைக்கபட்டிருக்கிறது, ஒவ்வொரு வருடமும் புதிய காலண்டரை புரட்டும் போது கடந்த வருடங்களின் இனிமையான மற்றும் ஏமாற்றமான கணங்கள் நினைவினில் பளிச்சிடும். ஒவ்வொரு காகிதமும் தன்னை இழந்து ஒரு புதிய நாளை கொண்டுவருகிறது. கடந்து போன தோல்விகளுக்கான ஆறுதலும், வரப்போகும் வெற்றிகளுக்கான கொண்டாட்டங்களும் கண்டிப்பாக அடுத்து வரப்போகும் நாட்களில் இருக்கும்.


"The future will be better tomorrow. WISH U HAPPY NEW YEAR TO ALL..






Share/Bookmark

Thursday, December 24, 2009

டிசம்பர் ஏமாற்றங்கள்.

திரை ரசிகர்களால் ஆவலுடன் ( ?)எதிர்பார்க்கப்பட்ட 'வேட்டைக்காரன்' திருப்பூரில் மட்டும் ஒன்பது திரையரங்குகளில் திரையிடப்பட்டது. நண்பர்களுடன் படம் பார்த்தேன். தனது முந்தைய படங்களை 'இளைய தளபதி' பார்த்திருக்க மாட்டார் என நினைக்கிறேன். அடுத்த முறை இயக்குனர்களிடம் கதை கேட்கும் போது தனது ரசிகர்களை மனதில் வைத்துக்கொண்டு கதை கேட்டால் ரசிகர்களுக்கும் நல்லது,, தளபதிக்கும் நல்லது. படத்தை கூட பொறுத்து கொள்(ல)ளலாம். ஆனால் டி.வி'யில் டிரைலரை,,, முடியலடா சாமி...
Why should people go out and pay money to see bad films,when they can stay at home and see the bad t.v programs for nothing?

வழக்கம்போல இந்த இடைத்தேர்தலிலும் ஆளும் கட்சியே வெற்றி பெற்றது. ஆளும் கட்சியினர், எதிர்கட்சியிலிருக்கும் உறுப்பினர்களை பணம் கொடுத்து தங்கள் பக்கம் இழுப்பதை தடுக்க கட்சி மாறினால் பதவி பறிக்கப்படும் சட்டத்தை கொண்டு வந்தனர். இப்போது "இடைத்தேர்தல்" என்ற பெயரில் மக்களுக்கு பணம் தந்து உறுப்பினர் எண்ணிக்கையை அதிகரித்து கொள்கின்றனர். எப்படியோ வாக்காளர்களின் "மதிப்பு" அதிகரித்துவிட்டது. ஜார்கண்ட் மாநில சட்டமன்ற தேர்தல் முடிவுகளும் வந்துவிட்டது, எந்த கட்சிக்கும் பெரும்பான்மை கிடைக்காததால் ஆட்சி அமைப்பதற்கான 'துருப்புச்சீட்டு' மீண்டும் "சிபு சோரன்" கையில்.. பேரங்களும் இனிதே துவங்கியிருக்கும்... வாழ்க ஜன(பண)நாயகம்.
"Democracy is a awlful way to run a country, But this is the best system we have.."

உலகமெங்கும் சுற்றுப்புறச்சூழல் ஆர்வலர்கள் பல்வேறு வழிகளில் சுற்றுப்புறச்சூழல் பாதுகாப்பு குறித்து விழிப்புணர்வு பிரச்சாரங்களை மேற்கொண்டுவரும் நிலையில், கோபன்ஹேகன் நகரில் நடந்து முடிந்த 15ஆவது சுற்றுப்புறச்சூழல் மாறுபாடுகள் குறித்த மாநாடு பல்வேறு விவாதங்களுக்கு பின்னரும் எந்தவித நல்லமுடிவுகளும் எட்டபடாமலே முடிந்தது. அனைத்து நாடுகளும் இப்பிரச்சனையை பொருளாதார நோக்குடனே அணுகுவது ஒருமித்தகருத்து ஏற்படுவதை தாமதபடுத்துகிறது. சுற்றுப்புறச்சூழல் ஆர்வலர்களின் நீண்டநாள் கோரிக்கையான சுற்றுப்புறச்சூழல் பற்றிய விழிப்புணர்வினை கல்வித்திட்டங்களில் இணைப்பதன் தேவை அதிகரித்துள்ளது.
Climate change is such a huge issue that it requires strong, concerted, consistent and enduring action by governments.

மத்திய அரசு, ஆந்திரமாநிலம் இரண்டாக பிரிக்கப்பட்டு "தெலுங்கானா" மாநிலம் அமைக்கப்படும் என் அறிவித்ததை தொடர்ந்து சற்று தணிந்திருந்த போராட்டங்கள் அரசின் பின்வாங்கலை தொடர்ந்து மீண்டும் துவங்கியுள்ளது. தனி தெலுங்கானாவை ஆதரிப்போர், எதிர்ப்போர் என இரு பிரிவினரும் வித்தியாசமின்றி அரசின் சொத்துகளை சூறையாடல், வன்முறை போராட்டங்கள் போன்ற செயல்களில் ஈடுபட்டு மாநிலத்தையே முடக்கியுள்ளனர். மகாத்மாவின் கொள்கைகளையே காற்றில் பறக்கவிட்ட இன்றைய அரசியல்வாதிகள், வல்லபாய் படேலின் "ஒருங்கிணைந்த பாரதத்தை" யா விட்டுவைப்பார்கள்., எப்படியோ நஷ்டம் மக்களுக்குத்தான்
"The ignorance of one leader in democracy, impairs the security of all people".
Share/Bookmark

Sunday, December 20, 2009

ஒரு எல்.கே.ஜி மாணவனின் நாட்குறிப்பு.

பெயர்:- அர்ஜுன் (செல்லப்பெயர் 'பப்லு')
வகுப்பு:- எல்.கே. ஜி
விருப்பம்:- விளையாடுவது
விருப்பம்:- சாப்ட் வேர் என்ஜினியர் (அம்மாவுக்கு)
விருப்பம்:- டாக்டர் (அப்பாவுக்கு)

நேரம்: காலை ஐந்து மணி.
அம்மா:- பப்லு சீக்கிரம் எழுந்திரிச்சு ரெடியாகு 'யோகா கிளாசுக்கு நேரமாச்சு... பப்லு:- சுத்த போர்..யோகா கிளாஸ் வேண்டாம்மா..
அம்மா:- டெய்லி யோகா செஞ்சாதான் மைன்ட் ரிலாக்ஸா டென்ஷன் இல்லாம இருக்கும்..
பப்லு:- அப்ப நீயும், அப்பாவும் போங்க...நா வரல...
அம்மா:- யோகா கிளாஸ்க்கு போகலேனா பூச்சாண்டிகிட்ட புடிச்சு கொடுத்துடுவேன்..க்விக்..
பப்லு:-............??...

காலை எட்டு மணி.
அம்மா:- பப்லு கெல்லாக்ஸ்(kelloggs) சீக்கிரமா சாப்பிட்டு முடி.. ஹிந்தி ட்யுசனுக்கு டயமாச்சு, மாஸ்டர் வந்துடுவார்.
பப்லு:- அந்த மாஸ்டர் எனக்கு புடிக்கல .. கெல்லாக்ஸ் நல்லாவே இல்ல,, நா இந்தி படிக்க மாட்டேன்..போ..!
அம்மா:- பப்லு.. குறும்பு பண்ணினா பூச்சாண்டிகிட்ட புடிச்சு கொடுத்துடுவேன்..ஃபீ கீப் கொயட் ! டூ வாட் ஐ சே..!
பப்லு:- .................???.....

காலை:- ஒன்பது மணி.
அம்மா:- பப்லு ஸ்கூல் பஸ் வந்தாச்சு, கிளம்பு ..லஞ்ச் மீதி வைக்காம சாப்பிடனும்...ஓ.கே.
பப்லு:- அம்மா "பிரட்" லஞ்ச் டைம்ல நல்லாவே இல்லை.. எனக்கு நூடுல்ஸ் வேணும்..அப்போ தான் ஸ்கூலுக்கு போவேன்.
அம்மா:- அடம் புடிக்காம ஸ்கூலுக்கு போ பப்லு..இல்லைனா, பூச்சாண்டிகிட்ட புடிச்சு கொடுத்துடுவேன்..
பப்லு:- ...............????......
காலை ஒன்பதரை மணியிலிருந்து மாலை நான்கு மணி வரை ஸ்கூல்ல ஆறு சப்ஜெக்ட்..ஆறு டீச்சர்கள் கதற, கதற மனப்பாடம்..(இதுல தூங்கவும் தனியா கொஞ்ச நேரம்)

மாலை: ஐந்து மணி
அம்மா:- பப்லு மியூசிக் கிளாஸ் போகணும்..இன்னும் என்ன விளையாட்டு? பப்லு:- நா கொஞ்சநேரம் விளையாடிட்டு போறேன்மா...
அம்மா:- சன் டேஸ்ல மட்டும்தா விளையாட போகணும், இப்போ மியூசிக் கிளாஸ்க்கு போகணும் இல்ல பூச்சாண்டிகிட்ட புடிச்சு கொடுத்துடுவேன்.... பப்லு:-...........????.......

மாலை:- ஏழு மணி.
அம்மா:- பப்லு 'ஹோம்வொர்க்' செய்யாம டி.வி'ல என்ன பாத்துட்டு இருக்கே?

பப்லு:- கார்டூன் பாத்துட்டு, ஹோம்வொர்க் செய்றேன்..நாளைக்கு சன்டே லீவுதானே?
அம்மா:- நாளைக்கு 'பிரெஞ்ச் கிளாஸ்', ஸ்விம்மிங் கிளாஸ் எல்லாம் இருக்கு.. பப்லு:- நோ.. ம்மா..சண்டே விளையாட போய்டுவேன்.
அம்மா:- இப்படியே அடம் புடிச்சிட்டே இருந்தா உன்ன பூச்சாண்டிகிட்ட புடிச்சு கொடுத்துடுவேன்..
பப்லு:-..........???..........

இரவு:- ஒன்பது மணி.
அம்மா:- பப்லு..சாப்பிடாம..உட்காந்துடே தூங்கிட்டு இருக்கே...சாப்பிடு
பப்லு:- எனக்கு தூக்கம் வருது..சாப்பாடு வேண்டாம்..
அம்மா:- சாப்பிடாம தூங்குனா..இப்போ பாரு பூச்சாண்டிகிட்ட புடிச்சு கொடுக்கிறேன்..!
பப்லு:- ஐயோ...அம்மா..என்னை "பூச்சாண்டிகிட்டையே புடிச்சு கொடுத்திடு"..நான் வீட்ல இருக்கல..நான் பூச்சாண்டிகிட்டயே போய்டுறேன்... அம்மா:- ...........????........
Share/Bookmark

Wednesday, December 16, 2009

ஒரு விளம்பரம்ம்ம்ம்...



"மாற்றம் என்பது ஒன்றுதான் மாறாதது" , இது இன்றைய வியாபார உலகின் மிக முக்கியமான துறையான விளம்பர துறைக்கும் பொருந்தும். ஒலி- ஒளி ஊடகங்களின் கட்டற்ற வளர்ச்சியின் பயனாய் கிளர்த்தெழுந்த விளம்பரத்துறை இன்று நவீன தொழில் நுட்பங்களால் மிகப்பெரும் வளர்ச்சியை அடைந்துள்ளது. பன்னாட்டு நிறுவனங்களின் வருகைக்கு பின் ஒவ்வொரு நிறுவனமும் சந்தையில் தங்களது இடத்தை தொடர்ந்து தக்கவைத்து கொள்ள பல்வேறு வகையான விளம்பர உத்திகளை கையாளுகின்றன. சில மணித்துளிகளே ஓடக்கூடிய விளம்பர படங்களுக்கு கோடிக்கணக்கான ரூபாய்கள் செலவிடும் நிலை இன்று சகஜமான ஒன்றாகும்.

தமிழகத்தில் விளம்பர துறையின் வளர்ச்சி சற்று வித்தியாசமான விதத்தில் முன்னேறி வருகிறது. பாலித்தீன் மூலக்கூறுகளை கொண்டு உற்பத்தி செய்யப்படும் " நெகிழ் துணி" எனப்படும் ஃபிளக்ஸ் பேனர்களில் செய்யப்படும் விளம்பரங்கள் கடந்த நான்காண்டுகளில் அபரிதமான, அபாயகர வளர்ச்சியை அடைந்துள்ளது. இவ்வகை விளம்பரங்கள் அறிமுகமான ஆரம்ப காலங்களில் அதிகசெலவு பிடிக்கும் எனும் காரணத்தினால் பெரும் நிறுவனங்கள் மட்டுமே பயன்படுத்தி வந்தன.

சுவர் விளம்பரங்கள், வால் போஸ்டர்கள், மற்றும் கட்-அவுட்கள் என்று விளம்பரங்களில் பல பரிமாணங்களை கடந்து வந்த அரசியல் கட்சிகளின் பார்வை "ஃபிளக்ஸ் பேனர்"களின் பக்கம் திரும்பியது. பயன்பாடும், தேவையும் அதிகரிக்க,அதிகரிக்க இன்று அனைத்து தரப்பினரும் பயன்படுத்தும் அளவிற்கு செலவு குறைவான ஒரு விளம்பர சாதனமாக ஃபிளக்ஸ் பேனர்கள் மாறியுள்ள நிலையில் வியாபார, தொழில் நிறுவனங்களுக்கு நிகராக தனிமனித விளம்பரங்களும் அதிகரித்துள்ளது.

தங்களது அபிமான தலைவர்களை வாழ்த்தியும், போற்றியும் துதிபாடுவதற்கு தற்போது மிகச்சிறந்த ஊடகமாக ஃபிளக்ஸ் பேனர்கள் திகழ்கிறது. தமிழகத்தின் தென் பகுதிகளில் துவங்கிய இந்த "அரசியல் கலாச்சாரம்" தற்போது தலைநகரம் உட்பட தமிழகத்தின் அனைத்து பகுதிகளிலும் பின்பற்றபடுகிறது.

அரசியல் நிகழ்ச்சிகள், திரைத்துறை நிகழ்வுகள் போன்ற காரணங்களுக்காக விளம்பரம் செய்யப்பட்ட நிலை மாறி தற்போது தனிமனிதர்களின் பிறந்தநாள் வாழ்த்துகளில் துவங்கி சுபகாரியங்கள், துக்க செய்திகள் வரை சகலமும் ஃபிளக்ஸ் பேனர்களின் மூலமே தெரிவிக்கபடுகிறது. பொது இடங்களில் வைக்கப்படும் பேனர்களின் மூலம் ஏற்படும் போக்குவரத்து இடையூறுகள் மற்றும் சுகாதார கேடுகளை பற்றிய அக்கறையோ, கவலையோ யாருக்கும் இல்லை ஏனெனில் அனைவருமே ஏதோவொரு சந்தர்ப்பத்தில் ஃபிளக்ஸ் பேனர்களில் தங்களது பெயரும், புகைப்படமும் இடம்பெறுவதை விரும்பும் நிலையே உள்ளது.

1978ல் Andy warhol என்ற ஊடகவியலாளர் விளம்பரங்களின் வளர்ச்சி பற்றி கூறிய புகழ்பெற்ற வாசகமான "In the future, everyone will be famous for atleast fifteen minutes" இதை இன்று உண்மையாக்கியத்தில் முக்கியபங்கு "ஃபிளக்ஸ் பேனர்களை"யே சாரும்.

சுற்றுப்புற சுகாதாரம் மாசுபடுதல், போக்குவரத்து இடையூறுகள் போன்ற பல்வேறு பிரச்சனைகளை ஏற்படுத்தும் "ஃபிளக்ஸ் பேனர்" கலாச்சாரத்தை கட்டுபடுத்த வேண்டிய அரசாங்கமே தங்களது சாதனை(..?)களை மக்களுக்கு சொல்கிறோம் என்ற வழியில் பொது இடங்களிலும், அரசு அலுவலகங்களிலும் பிரம்மாண்டமான பேனர்களை பயன்படுதுகின்றனர்.
( ஆளும் கட்சியை பற்றி சொல்லவே தேவையில்லை. சமீபத்தில் திருப்பூருக்கு வருகை புரிந்த 'சின்ன அண்ணனை' போற்றியும், பாராட்டியும் ஃபிளக்ஸ் பேனர்கள் வைக்க ஆன செலவு கிட்டதட்ட ஐம்பது லகரங்களை தாண்டும்)

டிஸ்கி : எனக்கெல்லாம் இரண்டுநாள் யாருடைய முகமும் ஞாபகத்தில் இல்லை,, யார பார்த்தாலும் அண்ணனுடைய முகம்தான் கண்ணுக்கு தெரிஞ்சது. அவ்வளோ பேனர்...என்னது பெரியண்ணனை பத்தி ஒண்ணுமே சொல்லலையா....அத அப்படியே லூசுல விடுங்கப்பா..




Share/Bookmark

Tuesday, December 8, 2009

அமிதாப் - துருவ நட்சத்திரம்.



இந்தி(ய) திரை ரசிகர்களால் மிகவும் எதிர்பார்க்கப்பட்ட " பா" திரைப்படம் சில தினங்களுக்கு முன் வெளியாகி வெற்றிகரமாக ஓடிக்கொண்டிருக்கிறது. இயக்குனர் 'பால்கி'யின் இரண்டாவது படமான இத்திரைப்படம் அனைத்து தரப்பு ரசிகர்களிடமும் மிகுந்த வரவேற்பை பெற்றுள்ளது. பால்கி'யின் தேர்ந்த இயக்கம், பி.சி .ஸ்ரீ ராமின் சர்வதேச தரத்திலான ஒளிப்பதிவு மற்றும் இளையராஜாவின் இனிமையான இசை என அனைத்து காரணங்களையும் விட படத்தின் வெற்றிக்கு முக்கிய காரணியாக விளங்குவது "அமிதாப்" .எனும் "உன்னத கலைஞன்".


"Progeria" எனும் மரபுசார் நோய் தாக்கப்பட்ட 13 வயது பள்ளி மாணவனாக நடித்திருக்கும் அமிதாப் , இளம் தலைமுறை நடிகர்களும் ஏற்க தயங்கும் கடினமான இப்பாத்திரத்தில் தனது மாறுபட்ட நடிப்பு மற்றும் தனித்துவமான 'உடல்மொழி' "னால் அனைவரையும் ஆச்சர்யபட வைத்துள்ளார்.


"பிக்-பி" என அனைவராலும் அழைக்கப்படும் அமிதாப் கடந்த நாற்பது ஆண்டுகளாக இந்திய சினிமாவின் சூப்பர் ஸ்டாராக தனது இடத்தை தொடர்ந்து தக்கவைத்துள்ளார். 1969 ல் "சாத் இந்துஸ்தானி " படத்தின் மூலம் இந்தி திரையுலகில் அறிமுகமாகி அடுத்தடுத்த தனது அதிரடியான நடிப்பினால் பல்வேறு வெற்றிகளை குவித்த இவர் "திவார்" மற்றும் " சோலே " திரைப்படங்களின் மாபெரும் வெற்றியின் மூலம் "சூப்பர்ஸ்டார் " அந்தஸ்தை பிடித்தார்.


திரையில், சமூக அநீதிகளுக்கெதிரான கோபம் கொண்ட இளைஞனாக தன்னை நிலை நிறுத்திய அமிதாப் 1984ல் தனது நெருங்கிய நண்பரான ராஜீவின் ஆதரவுடன் அரசியலில் நுழைந்தார். தனது சொந்த தொகுதியான "அலகாபாத்"லிருந்து பாராளமன்ற உறுப்பினராக தேர்ந்தெடுக்கப்பட்டார். அதிக வாக்குகள் வித்தியாசத்தில் வெற்றி பெற்றபோதும் ஊழல் குற்றசாட்டுகள் காரணமாக தனது பதவியை உதறினார். பின்பு நீதிமன்றம் ஊழல் குற்றசாட்டுகளில் அமிதாபிற்கு தொடர்பில்லை என்று கூறியபோதும் அரசியலிலிருந்து விலகியே இருந்தார்.


அரசியலில் பெற்ற சரிவுகள் திரை வாழ்கையிலும் தொடர்ந்தது. தனது சொந்த திரைப்பட தயாரிப்பு நிறுவனத்தை துவங்கிய அமிதாப், தொடர் தோல்விகளினால் தொண்ணுறுகளின் இறுதியில் கடுமையான பொருளாதார சிக்கல்களை சந்தித்தார்.


திரைத்துறையில் இருந்து சற்று விலகியிருந்த அமிதாப்,, தொலைக்காட்சியில் "கான் பனேகா கரோர்பதி" நிகழ்ச்சியின் மூலம் தனது இரண்டாவது வெற்றிப்பயணத்தை துவக்கினார். இந்தியாவின் மிகப்பெரும் வெற்றிபெற்ற தொடராக கருதப்படும் இந்த தொடர் மீண்டும் அமிதாப்பை 'ஸ்டார்' அந்தஸ்திற்கு கொண்டு சென்றது. மீண்டும் திரைப்படங்களில் நடிக்க துவங்கிய அமிதாப், தனது கதாபாத்திரங்களை தேர்ந்தெடுத்து நடிக்க துவங்கினார்.


மொஹாபதின், கபி குஷி கபி கம், காக்கி மற்றும் ப்ளாக் போன்ற படங்களின் மாபெரும் வெற்றி வணிகரீதியாக மட்டுமல்லாமல் சர்வதேச அளவிலும் பெரும் புகழை ஈட்டித்தந்தது. அமீர்,ஷாருக் மற்றும் சல்மான் கான்களின் ஆதிக்கம் இளம் தலைமுறை நடிகர்களின் வரவு என இன்றைய இந்தி திரையுலகிலும் தனது ஆதிக்கத்தை செலுத்தும் அமிதாப், விளம்பரப்படங்களிலும் தனது முதலிடத்தை தொடர்கிறார்.


இந்திய திரையுலகின் சூப்பர்ஸ்டார், வெற்றிகரமான தொலைகாட்சி தொகுப்பாளர், பின்னணி குரல் கலைஞன், திரையுலகின் அதிக வர்த்தக மதிப்புடைய குடும்பத்தின் தலைவன் என பல்வேறு வெற்றிகரமான முகங்களையுடைய "அமிதாப்" இன்றைய திரை நட்சத்திரங்களில் தனித்து மின்னும் " துருவ நட்சத்திர" மாக விளங்குகிறார்.








Share/Bookmark

Monday, November 30, 2009

மற்றுமொரு காதல்கதை.(1)

எல்லா காதல்களையும் போலலல்லாமல் இந்த காதல் ஒரு அரைவேக்காட்டு காலையில் துவங்கியது.(அதிகாலைங்க..)

வேலை நிமித்தமாக திடீரென 'பெங்களூரு' செல்லவேண்டிய நிர்பந்தம், இரயிலில் முன்பதிவு செய்யாததால் பேருந்தில் செல்வது என முடிவுசெய்தேன். பேருந்து பயணத் துணையாக ஏதோவொரு நண்பரை அழைத்து செல்ல முடிவுசெய்தவுடன் 'டக்' கென நினைவில் வந்தது, எங்கள் நண்பர் குழாமின் ' காதல்நாயகன்' ( நம்ம கதை நாயகன்) வந்தாரையெல்லாம் வாழ வைக்கும் திருப்பூரில் எந்த வேலையும் இல்லாமல் இருப்பதுதான் இவரது வேலையே.( காதலிப்பதும் பகுதிநேர வேலைதான்)

அவரது முந்தைய காதல்கதையை சுருக்கமாக கூறுவது அவரைப்பற்றியும் அறிந்துகொள்ள உதவும். (பிளாஷ்பேக் பொறுத்தருள்க)

பாஸ்போர்ட் அலுவலகத் தேவைக்கென ஆவணங்களை நகலெடுக்க நண்பர்கள் நான்கைந்து பேராக ஜெராக்ஸ் ஒன்றிற்கு சென்றிருந்தோம், சற்று கூட்டமாக இருந்தததால் அங்கு பணிபுரிந்து கொண்டிருந்த இளம்பெண்ணை தனித்தனியாக ஓரக்கண்ணால் பார்த்துக் கொண்டிருந்தோம். தனது வேலைகளை முடித்தவுடன் எங்கள் பக்கமாக பார்வையை திருப்பி 'நம்ம' நாயகனிடமிருந்த ஆவணங்களை நகல் எடுப்பதற்காக வாங்கினாள். பின்பு எல்லோரும் தத்தம் ஆவணங்களை நகல் எடுத்துக்கொண்டு கடையிலிருந்து வெளியேறினோம். பேச்சு அந்த இளம்பெண்ணை பற்றி திரும்பியது உடனே ஒருவித பரவச நிலையிலிருந்த நமது நண்பன் கனவு கலைந்தவனாய், எங்களை நோக்கி " அந்த பெண்ணை பற்றி பேசாதீங்க" என்றான்.
ஏண்டா மாப்பு, உங்களுக்கு ஏதாவது சொந்தமாடா..? என்று கேட்ட என்னைநோக்கி சற்று கோபத்துடன்,
"இனி சொந்தம் ஆக போரவடா,, என்னை அந்த பொண்ணு லவ் பண்ணுதுன்னு நினைக்கிறேன்" என்றான்.
டேய் ..என்னடா சொல்றே..? எப்படிடா?
"எல்லோரும்தானே ஜெராக்ஸ் எடுக்க நின்னுட்டு இருந்தோம், ஆனா எனக்குத்தானே முதல்ல எடுத்து கொடுத்துச்சு..அதுவும் சிரிச்சிகிட்டே." என்றான் (காதல் வயப்படுவது "பயபுள்ளைக்கு" அவ்ளோ ஈசி..)

தன் வாழ்நாளில் அதிகம் பயன்படுத்தாத சில சொற்களை இந்தமாதிரியான சமயங்களில் பயன்படுத்துவது அவனது பழக்கம்.

" சீக்கிரம் செட்டில் ஆகணும்டா..ஃபாரின்ல ஏதாவது சான்ஸ் கிடைச்சா நல்லாருக்கும்" என்றவாறே பாஸ்போர்ட் விண்ணப்பத்தை வெறித்து பார்த்தான்.
" அதா மாப்புளை எல்லோருக்கும் சேர்த்து காசு கொடுத்தானா? எப்படியோ நல்லா இருந்தா சரிடா"
"பொண்ண பார்த்தா நம்ம சைடு மாதிரி இல்லேடா. ஆனா அதுவும் ஒரு மாதிரிதா சிரிச்சது." என்று ஆளாளுக்கு தங்களது உடுக்கையை அடிக்க துவங்கினர்.
அடுத்து அவன் வாழ்வில் வந்த சில தினங்கள் "நகலெடுத்த பொழுதுகளாகவே" கழிந்தது. அவன் வீட்டிலும், ஏனைய நண்பர்கள் வீடுகளிலும் காணப்பட்ட நகலெடுக்கும் வாய்ப்புகளையெல்லாம் பயன்படுத்தி தனது இதயத்தின் நகலை தேடத் துவங்கினான்.
நகலெடுக்கும் சேவையில் தன்னை முழுமையாக அர்பணித்திருந்த ஒரு வாரத்திற்கு பிறகு, காதல் பரிணாமத்தின் அடுத்த வளர்ச்சியான கவிதை கட்டத்தை எட்டியிருந்தான்.
பொன்னிற மாலை ஒன்றில் தனது இதயத்தின் காதலையெல்லாம் வெள்ளைத்தாளுக்கு இடம்மாற்றி கவிதை என்ற படிம வஸ்துவை தயார் செய்திருந்தான். கவிதைதாளுக்கு கொஞ்சமாகவும், தனக்கு சற்று அதிகமாகவும்.(?.) அலங்காரம் செய்துகொண்டு " நகலகம்" நோக்கிய தனது வரலாற்று சிறப்புமிக்க பயணத்தை துவங்கினான்.
நகலகத்தில் , கடையின் உரிமையாளர் இல்லாதிருப்பது, தனக்கு கிடைக்கும் வரத்தின் ஒரு பகுதியாகவே நினைத்து தனக்குள் சிறிது காலமாக பதுங்கியிருந்த வெட்கத்தை வெளிக்கொணர்ந்து (இவ்வாறு வெளிக்கொணர்வது அனேகமாக இது நான்காவது முறை) தனது இதயத்தின் நகலை தனது உயிரின் நகலிடம்,

" படிச்சு பாருங்க..." என்றபடியே தந்தான்.

" ஆறு மணிக்கு கரண்ட் போயிடும்,, எத்தனை காப்பி வேணும்,, சீக்கிரம் சொல்லுங்க" என்று கேட்டு நண்பனின் கரண்டை சட்டென கட் செய்தாள்.

காதல் துவங்குவதை விட வேகமாக முடிந்துவிடும் என்ற உண்மையை எப்போதும் நினைவில் கொண்டிருக்கும் நமது நாயகன் அடுத்து வந்த சில பொன்னிற மாலைகளை, பொன்னிற பானம் கொண்டு (பீர்) மறக்க முயன்று கொண்டிருந்தான்.

பெங்களூரு செல்லும் எனது திட்டத்தை கூறியதும், தனது முந்தய காதலின் (..?) தோல்வியிலிருந்து முழுமையாக வெளிவந்தார்..(அதாங்க., தாடிய 'சேவ்' செய்துட்டார்)

லோக்கல்லையே படையல போடுற நம்மாளு, அவுட் ஸ்டேசன்னா பொங்க வைச்சு கிடாயே வெட்டுவானே...

அடுத்த பதிவில்...."பெண்களூரு"

Share/Bookmark

Thursday, November 26, 2009

காஷ்மீர் - எம் .ஜே .அக்பர்.




எல்லாம் வல்ல இறைவன் எப்போதும் புதிரானவன். சொர்க்கங்களை படைப்பதும், அவற்றை ஓயாத துன்பத்தில் ஆழ்த்துவதும் 'ஆதாம்-ஏவாள்' காலந்தொட்டே இறைவனுக்கு வழக்கமான ஒன்றாகும். பூலோக சொர்க்கமாக விளங்கும் "காஷ்மீர்" ஓயாத அரசியல் பிரச்சனைகளாலும், தீவிரவாத தாக்குதல்களாலும் தனது பெருமைகளையும்,பொலிவையும் இழந்து "இழந்த சொர்க்கத்தின்" நீட்சியாக இன்று திகழ்கிறது.

பனி உறைந்த ஏரிகளாலும், பசுமை கொஞ்சும் பள்ளத்தாக்குகளாலும் சூழப்பட்டு சொர்க்கத்தின் பிரதியாக திகழும் காஷ்மீரை பற்றிய தகவல்களை அறிந்து கொள்ளும் ஆவலில் அதைப்பற்றிய புத்தகங்களை தேடியபோது, நண்பர் ஒருவரின் ஆலோசனையின் படி படித்த புத்தகம் திரு.எம். ஜே. அக்பரின் " KASHMIR..Behind the Vale "

இந்தப் புத்தகம் புராணகாலம் முதல் இன்றுவரை காஷ்மீரின் உண்மையான வரலாற்றையும் ,இந்திய-பாகிஸ்தான் பிரிவினைக்கு பிறகான வரலாற்று சிக்கல்களையும் தெளிவாக விவரிக்கிறது. காஷ்மீர் பிரச்சனை என்பது இந்தியர்களை பொருத்தமட்டில் வெறும் அயலுரவுப்பிரச்சனை மட்டுமன்று, இது இந்து, முஸ்லீம் போன்ற மதங்களையும் கடந்து இந்தியாவின் ஆன்மா சம்பந்தப்பட்ட ஒரு சிக்கலாகவே பார்க்கப்படுகிறது.

இந்துசமய ராஜபுத்திர சிற்றரசர்களால் ஆளப்பட்டு வந்த காஷ்மீர் பள்ளத்தாக்குகளை முகலாயப்பேரரசர் அக்பர் அழகினில் மயங்கி தனது ஆட்சியின் கீழ் இணைத்தது முதல் ஒருங்கிணைந்த இந்தியாவின் முக்கியமான பகுதியாக விளங்கும் காஷ்மீரின், நவீன வரலாறு இரத்தம் கொண்டே எழுதப்பட்டுள்ளது. இந்துசமய மன்னர்களாலும், முகலாய பேரரசர்களாலும் காஷ்மீர் மாறி,மாறி ஆட்சி செய்யப்பட்ட போதும் சரி, பாகிஸ்தான் பிரிவினைக்கு பிறகு இந்தியாவுடன் இணைந்த பிறகும் சரி, காஷ்மீர் யுத்த பூமியாகவே திகழ்கிறது.

1947இல் முதலாவது காஷ்மீர் போருக்கு பிறகு காஷ்மீர் பிரதேசங்களிலும், இந்தியாவின் பிறபகுதிகளிலும் நடைபெறும் அனைத்து தீவிரவாத நடவடிக்கைகளுக்கும் மூலகாரணமாக இருப்பது காஷ்மீர் பிரச்சனையே ஆகும். காஷ்மீரின் முழுமையான வரலாற்றையும் , அங்கு தற்போது நிலவிவரும் தீவிரவாத பிரச்சனைகளுக்கு பின்புலமாக அரசியலும் , மதமும் எவ்வாறு செயல்படுகிறது என்பதை நடுநிலையுடன் இப்புத்தகத்தின் வாயிலாக அறியமுடியும்.

உண்மையான வரலாற்றின் சுவடுகளை தெரிந்து கொள்வதுதான் எதிர்கால சமூகத்தை "அறிவார்ந்தசமூகமாக" கட்டமைக்க சிறந்தவழி என்று தொடர்ந்து தனது படைப்புகள் மூலம் வெளிப்படுத்திவரும் எழுத்தாளர் திரு.எம்.ஜே.அக்பர் அவர்கள் இந்தியாவின் முக்கியமான அரசியல் எழுத்தாளர் ஆவார். இவரது பிற புகழ்பெற்ற நூல்கள் " Nehru-The making of India ',Riot after Riot, The shade of swords" போன்றவைகளாகும். வரலாற்று சம்பவங்களை தனது இயல்பான எழுத்துநடையில் எழுதிவரும் திரு.அக்பரின் இந்நூலை படிப்பது காஷ்மீர் குறித்து முழுவதுமாக அறிந்துகொள்ள மட்டுமல்லாமல் அவரது சமீபத்திய நூல்களை படிக்க ஒரு துவக்கமாகவும் அமையும்.




Share/Bookmark

Saturday, November 14, 2009

சென்னையில் இருதினங்கள்.

கடந்த மூன்று நாட்கள் தற்காலிக சென்னைவாசம். மாநகரையே புரட்டிப்போடிருந்த மழை சற்று ஓய்ந்திருந்து. இடையூறுகள் எதுவுமின்றி எனது பணிகளை முடிக்க முடிந்தது. எனினும் மழையின் பாதிப்புகள் நான் எதிர்பாத்திருந்ததை விட சற்று அதிகம்தான்.


சென்னை போன்ற பெருநகரங்களில் வசிக்கும் மக்கள் புயல்,மழை போன்ற பாதிப்புகளிலிருந்து மீண்டு விரைவில் சகஜமான வாழ்க்கை முறைக்கு திரும்ப பழகிவிடுகின்றனர்.
பெசன்ட்நகர் கடற்கரை அருகே இரவு நேர உணவு கடைக்காரரிடம் மழை பற்றி கேட்டேன்.
"நல்லா மழை அடிக்கட்டும் சார். வருசம் பூரா தண்ணி பிரச்சனையாவது தீரும்" என்றார். "தேவை"தான் மனிதவாழ்க்கையை தொடர்ந்து செலுத்துகிறது".


கடந்த பத்துவருடங்களில் சென்னை நகரில், உணவகங்களின் வளர்ச்சி பிறதுறைகளின் வளர்ச்சிக்கு சற்றும் குறையாமல் இயல்பாக நிகழ்ந்துள்ளது.
பன்னாட்டு உணவு நிறுவனங்கள் ஒருபுறம், பழைமையான உணவுமுறைகளை மீள் ஆக்கம் செய்யும் நவீன உணவகங்கள் மறுபுறம் என, கலவையான வளர்ச்சி பிரமிப்பூட்டுகிறது.

" There is no sincerer love than the love of food".


இந்தியாவின் முன்னனி கார் உற்பத்தி நிறுவனத்தில் அரை லட்சத்திற்கும் அதிகமான மாதசம்பளம் பெரும் நெருங்கிய தோழருடன் பேசிக்கொண்டிருந்தேன்,
சாத்தியமில்லாத இலக்குகளை விரட்டும் பணியின் சலிப்புகளும், மேலதிகாரிகளை சமாளிக்கும் சங்கடங்களும் நாளுக்குநாள் அதிகரித்து வருவது குறித்து வருந்தினார்.
"You are getting paid for telling lies..And superiors getting paid for asking questions and acceptinng ur lies".


புகழ்பெற்ற மருத்துவ நிபுணர் பத்மஸ்ரீ K.V.திருவேங்கடம் அவர்களை சந்திக்கும் வாய்ப்பு கிடைத்தது. எண்பது வயதை கடந்து இன்றும் தன் பணியின் மீது காட்டும் அக்கறையும், ஆர்வமும் அனைவரும் கற்க வேண்டிய ஒன்று. மருத்துவத்துறையில் அவர் பெற்றிருக்கும் புகழும், பாராட்டுக்களும் அவரின் எளிமையான அணுகுமுறையை சற்றும் பாதிக்காமல் தொடர்வது ஆச்சிரியமான ஒன்று.
"To give a real service you must add something which cant be brought or measured with money,And that is sincerity and integrity".


Share/Bookmark

Friday, November 6, 2009

சச்சின் : சாதனைகளின் நாயகன்.




"கிரிக்கெட் ஒரு மதமாக போற்றப்படும் நாட்டில் சச்சின்தான் கடவுள்" பேரி ரிச்சர்ட்ஸ்.(முன்னாள் தென்னாப்பிரிக்க கிரிக்கெட் வீரர்)


1989ஆம் ஆண்டு நவ 15ம் நாள் துவங்கிய "சச்சின் எனும் ரன் இயந்திரம்" இருபது ஆண்டுகளைக் கடந்தும் இன்றும் தனது தேசத்திற்கு தன் பணியை பழுதில்லாமல் செய்துவருகிறது.


மும்பையில் ஒரு மத்தியதர குடும்பத்தில் பிறந்து தனது கடின உழைப்பினாலும், தனித்திறமிக்க ஆட்டத்தினாலும் நூறுகோடி பேரை மக்கள்தொகையாக கொண்ட ஒரு நாட்டின் "ஆதர்ச நாயகனாக" திகழும் சச்சினுக்கு சர்வதேச கிரிக்கெட்டில் இது இருபதாவது ஆண்டு..


இந்தியாவின் மக்கள்தொகை எவ்வளவோ,அதே அளவு தனக்கு ரசிகர்களை கொண்டிருக்கும் சச்சின், இந்தியா தவிர்த்து பிற நாட்டு ரசிகர்களிடமும், கிரிக்கெட் வல்லுநர்களிடமும் மாறாத அபிமானத்தை பெற்றுள்ளார்.
டெஸ்ட் மற்றும் ஒருநாள் கிரிக்கெட் போட்டிகளில் பல்வேறு மைல்கற்களை கடந்துள்ள சச்சின் உலக அளவிலான சாதனைப்பட்டியலில் ஐம்பதிற்கும் அதிகமான சாதனைகளில் தனது பெயரை பதித்துள்ளார். இதில் தனிநபர் சாதனைகளே அதிகமாகும்.(அதிக சாதனைகளை செய்ததே ஒரு சாதனை)


சச்சினின் சாதனைகள் பற்றிய விபரங்கள் ஒரு நீண்ட பதிவாக போடுமளவுக்கு இருக்கிறது.


சச்சினின் சாதனைகள் பற்றிய விபரங்களுக்கு இங்கே கிளிக் செய்யவும்.


தனது கடின உழைப்பின் மூலம் உலககிரிக்கெட் அரங்கில் தனக்கென தனி சிம்மாசனம் அமைத்து ரசிகர்களின் மனதில் முடிசூட மன்னனாக விளங்கும் சச்சினின் சாதனைகள் மேலும் தொடர வாழ்த்துவோம்.


Share/Bookmark

Thursday, October 8, 2009

கேள்விக்குறி

கடந்த இருதினங்களில் ஊடகங்களில் கண்ட இரு வெவ்வேறு செய்திகள் நமது சமூகம் பின்பற்றிவரும் பல்வேறு பழக்க, வழக்கங்களுக்கு சரியான காரணங்களும் அவற்றிற்கான வழிமுறைகளும் சரியாக கற்றுத்தரப்படவில்லை என்பதை தெளிவாக உணர்த்தியது....அந்த செய்திகள்..
1.தனியார் தொலைகாட்சி ஒன்றில் ஒளிபரப்பாகிய "பலியிடுதல்" பற்றிய விவாதம்...
2. நாளிதழ் ஒன்றில் கண்ட "இறைச்சி" பதப்படுத்தும் தொழிற்சாலையின் விளம்பரச்செய்தி..(இறைச்சி பதப்படுத்தும் தொழிலில் ஆண்டுக்கு 'ஆயிரம்கோடி' வர்த்தகத்தை நோக்கிசெல்லும் நிறுவனம்)
மனிதர்கள் உணவுத்தேவைக்காக விலங்குகளைத்தான் முதன்முதலில் பயன்படுத்ததுவங்கினர். வேளாண்முறைகள் கண்டறியப்பட்ட பின்புதான் உணவுப்பழக்கங்களில் சைவம், அசைவம் என்று பாகுபாடு தோன்றியது. நாகரிகம் சற்று முன்னேறி மனிதர்கள் இனக்குழுக்களாக பிரிந்து வாழ துவங்கியதிலிருந்து, தங்களை பிறரிடமிருந்து தனித்து காட்டுவதற்கென தனியான இறைவழிபாடுமுறைகள், கலாச்சாரங்கள் போன்றவற்றை ஏற்படுத்திக்கொண்டபோதும் உணவுத்தேவையாய் இருந்து "பலியிடுதல்" என்னும் வழக்கமாக மாறி.., நாகரீகமும்,அறிவியலும் பெருமளவு வளர்ந்துவிட்ட இந்நாட்களிலும் தொடர்ந்துவருகிறது..
நாகரீகம் சற்று மேம்பட்டிருந்த இடைக்காலத்தில் சமண,பௌத்த சமயங்கள் 'புலால் மறுப்பை' தங்களது முக்கிய கோட்பாடாக கொண்டிருந்தபோதிலும் ஆரியர்கள் மற்றும் முகலாயர்களின் வருகைக்கு பின் அசைவம் இந்தியர்களின் உணவுப்பழக்கத்தில் முக்கியமான இடத்தை பெற்றுவிட்டது.
மனிதவாழ்வின் அனைத்து நிலைகளையும் அறிவியல் ஆட்கொண்டுவிட்ட இன்றைய நவீன இந்தியாவிலும் உணவுத்தேவையின் ஒரு பிரிவான "அசைவ உணவு" என்பது "பலியிடுதல்" என்ற பெயராலேயே பெரும்பாலும் கற்பிக்கப்படுகிறது.
ஆதிகாலம் முதல் இன்றைய நவீனகாலம் வரை சக மனிதர்களை ஏமாற்றவும், அடக்கியாளவும் அவர்கள் பின்பற்றும் அல்லது நம்பும் கோட்பாடுகளையும், நம்பிக்கைகளையும் பயன்படுத்துவது எளிதான செயலாக உள்ளது. மூடநம்பிக்கைகளின் உச்சமாக மனிதர்களையே பலியிடும் "நரபலி" செய்திகளை இன்றும் கண்டுவருகிறோம். உணவு பழக்கங்கள் மட்டுமின்றி தற்போது நமது சமூகத்தில் நடைமுறையில் இருந்துவரும் பல வழக்கங்களுக்கு சரியான காரணங்கள் கற்பிக்கபடாததால், அவற்றைப் பயன்படுத்தி மூடநம்பிக்கைகளை வளர்ப்பதுடன் அவற்றை அரசியல்,வியாபாரம் மற்றும் வன்முறை போன்ற தேவைகளுக்கு பயன்படுத்துவது அதிகமாகியுள்ளது.
ஒரு மனிதன் மேம்பட்ட நிலையை நோக்கிசெல்லும்போது தனது சமூகத்தில் கடைபிடிக்கப்பட்டு வரும் அடிப்படையான பழக்க,வழக்கங்களின் உண்மையான காரணத்தையும், அவசியத்தையும் அறிந்து பின்பற்றுவது அல்லது காலமாற்றத்திற்கு ஏற்ப அவற்றை கைவிடுவதும் அவர்களுக்கு மட்டுமின்றி எதிர்கால சந்ததியினருக்கும் நன்மையை தரும். இல்லையெனில் கேள்விகளில் துவங்கவேண்டிய "சமூகமேம்பாடு" கேள்விக்குறிகளில் முடிவடைந்துவிடும்.
Share/Bookmark

Sunday, October 4, 2009

''பேராண்மை''- புதியகளம்.





இயக்குனர் திரு.ஜனநாதன் இயக்கத்தில் "இயற்கை", "ஈ" படங்களை தொடர்ந்து மூன்றாவதாக விரைவில் வெளிவரவிருக்கும் திரைப்படம் "பேராண்மை".
தனது முந்தைய இரு திரைப்படங்களிலும் மாறுபட்ட கதைக்களங்களை தேர்ந்தெடுத்து வெற்றிகண்ட ஜனநாதன் தனது புதியபடைப்பிலும் தமிழ்த்திரைக்கு புதிதான ஒரு கதைக்களத்தை அமைத்துள்ளார்.
'ஜெயம்ரவி' நடித்துள்ள இத்திரைப்படத்தின் படப்பிடிப்பு தமிழகத்தின் அடர்ந்த வனப்பிரதேசங்களில் நடத்தப்பட்டுள்ளது. இத்திரைப்படத்தின் பாடல்கள் வெளியிடப்பட்டு வெற்றிபெற்றுள்ள நிலையில் திரைப்படத்தின் விளம்பரங்களும் எதிர்பார்ப்புகளை அதிகரிக்க செய்துள்ளது.
' ஒரு நாட்டை ஆக்கிரமிப்பு செய்வதற்கும்,அடிமை படுத்துவதற்கும் உள்ள பல்வேறு வழிகளில் அந்நாட்டின் இயற்கை வளங்களை கைப்பற்றுவதையும் ஒரு வழியாக கொண்டு செயல்படும் அந்நிய சக்திகளுடன் போராடும் ஒரு இளைஞனின் கதை' என்று குறிப்பிட்டுள்ளார் இயக்குனர்.
தனது முந்தைய படைப்பான "ஈ"யில் வளர்ந்த நாடுகளின் மருத்துவ குற்றங்களை சமூக அக்கறையுடன் அம்பலப்படுத்திய திரு.ஜனநாதன் தனது "பேராண்மை' திரைப்படத்தில் உலகம் தற்போது எதிர்நோக்கியுள்ள சுற்றுப்புறச்சூழல் பாதிப்புகளையும்,,வளர்ந்தநாடுகளின்.,வளரும்நாடுகள் மீதான சுற்றுப்புசூழல் சார்ந்த மறைமுக தாக்குதல்களையும் கதைக்களமாக அமைத்துள்ளார்.
. இந்தியாவில்மட்டுமேகிடைக்கக்கூடியபல்வேறு தாவரவகைகளுக்கும்,
மருத்துவ குணங்களையுடைய அரியவகை மூலிகைகள் பலவற்றிற்கும் மேலைநாடுகள் சர்வதேச சட்டங்களை கொண்டு "காப்புரிமை" பெற்றுவரும் நிலையையும்,சர்வதேச நாடுகளிடமிருந்து பெறப்படும் கடனுதவிகளுக்கு ஏற்ப தனது நாட்டின் விவசாயக்கொள்கைகளையே மாற்றியமைத்துகொள்ளும் இன்றைய அரசியல் சூழலுக்கு எதிரான தனது கருத்துக்களையும் இயக்குனர் தனது "பேராண்மை" திரைப்படத்தின் வாயிலாக சாடியிருப்பார் என்றே நம்புவோம்.

Share/Bookmark

Friday, October 2, 2009

"காப்பி அண்ட் பேஸ்ட்"

"கண்டதை தின்பவன் குண்டனாவான்..கண்டதை படிப்பவன் பண்டிதனாவான்" இந்த பழமொழிக்கு தகுந்தபடி டீக்கடைல பஜ்ஜி மடித்து தர்ற பேப்பரக்கூட ஒருதரம் படித்துவிட்டுதான் கசக்கிபோடுவேன்.
பண்டிதனா ஆவமோ?இல்லையோ? மற்ற நண்பர்களிடம் அதை பகிர்ந்துகொள்ளலாம் என்பதற்குத்தான் இந்த "காப்பி அண்ட் பேஸ்ட்" ..
கவிஞர்,கதாசிரியர் மற்றும் இயக்குனர் என்ற பன்முகத்திறமை கொண்ட திரு.இளையபாரதி அவர்களின் "பட்டினப்பாலை" கவிதைதொகுப்பில் ஒரு கவிதை..
அதீத கற்பனை,அழகியலான மொழிநடையில் அமையும் கவிதைகள்தான் சிறப்பாக அமையும் என்றல்லாமல் "எளிமையான உண்மை" இருக்கும் கவிதைகளும் சிறப்பாக இருக்கும் என்பதற்கு சிறந்த எடுத்துக்காட்டு இக்கவிதை.

மீன் குஞ்சுகளை
விரட்டிக்கொண்டிருந்தது
உறுமீன்,
கடல் தன்னுடையதென்று..
உறுமீனின் உறுமலுக்கு பயந்து நடந்தன
மீன்குஞ்சுகள்.
ஒரு வலை விழுந்தது கடலின் கர்ப்பத்தில்
வலையின் இடைவெளியில் தப்பின
மீன்குஞ்சுகள்.
வலைக்குள் துடித்தது உறுமீன்.
வாரம் சிலகழித்து
வளர்ந்த குஞ்சொன்று
சொல்ல ஆரம்பித்திருக்கிறது
கடல் என்னுடையதென்று..
Share/Bookmark

Tuesday, September 29, 2009

மாநகர் வாழ்க்கை

மழைக்கால பாதையில்
நனைந்தபடியே நடப்பது
எப்போதும் சுகம்தான்..

ஜில்லிடும் தார்சாலை,
சாலையோரத் தேநீர்,
பெருமழைக்கு போட்டியாய்
சிறுமழை பொழியும் மரங்கள்,
மழைநீரில் கடல்செய்து
கப்பல்விடும் மழலை மாலுமிகள்,
மழைக்குளிர் விரட்ட
சிறகடிக்கும் பறவைகள்,
மேகப்பருக்கள் நீங்கி
பொலிவடையும் புதுவானம்.,

மழைக்காட்சிகள் எல்லாமே சுகம்தான்..
மாநகர வாழ்க்கை
மழையையும் வெறுக்க பழக்கிவிட்டது..

மழையில் நனைதல்..
நிலாச்சோறு உண்ணல்..
பறவைகள் பார்த்தல்..
தோட்டங்கள் வளர்த்தல்..
இயற்கையில் திளைத்தல்..
விருப்பங்கள் எல்லாவற்றிற்கும்
சுய விவரப்பட்டியலில் மட்டுமே இடமுண்டு.

நல்லவேளை
இன்று மழையில் நனைந்துவிட்டேன்,
இனி எப்போது வருமோ?
இன்னொரு மழை...
Share/Bookmark

Sunday, September 20, 2009

சாத்தியம்




அடுக்குமாடி குடியிருப்புகள்
சாத்தியப்படுத்தியது
கோலங்களற்ற விடியல்களை...


தொலைக்காட்சிபெட்டிகள்
சாத்தியப்படுத்தியது
கொண்டாட்டங்களற்ற பண்டிகைகளை...


கடன்அட்டைகள்
சாத்தியப்படுத்தியது
பேரங்களற்ற வியாபாரங்களை...


கணிப்பொறி விளையாட்டுக்கள்
சாத்தியப்படுத்தியது
பலூன்காரன் வராத தெருக்களை...


கைப்பேசிகள்
சாத்தியப்படுத்தியது
முகங்கள் அறியாத காதல்களை...


இணையங்கள்
சாத்தியப்படுத்தியது
சுவர்களற்ற படுக்கையறைகளை...


"ஏதோவொரு" தொழில்நுட்பம்
சாத்தியப்படுத்தும்
மனிதமற்ற மனிதர்களை...

Share/Bookmark

Friday, September 18, 2009

நினைவின்பயணம்

ஒரு இலையுதிர் மாலையில்
பார்வைகள் சந்தித்தபோது
துவங்கிய நம் பயணம்...

பூக்கள் நிறைந்திருந்த
வசந்தத்தின் வீதிகளில்
கைகோர்த்தபடி தொடர்ந்தது..

அச்சம் எனும் அடைமழையில்
நீ நனைந்தபோது
கரைந்தது,,
உன் மனதில் படிந்திருந்த
என் பிம்பம்..

பிரிவென்னும் கோடையை
கடந்த பின்னும்
உருகாதிருப்பது,,
எனக்குள் உறைந்துபோன
உன் பிம்பம்..

நினைவுச் சாலையின் தூரம்
நீண்டு கொண்டேயிருக்கிறது,
வெயில்தகிக்கும் வேளையிலும்
களைப்பு நேர்வதில்லை,
அடர்ந்திருக்கும் உன்
ஞாபகமரங்களினூடே செல்வதால்..
Share/Bookmark

Monday, September 7, 2009

மருதாணி.

மரங்கள்,செடிகளுடனான எனது தொடர்பு குழந்தைப்பருவத்திலிருந்தே துவங்கியது. எனினும் பதினாறு ஆண்டுகளுக்கு முன்பு இப்போது வசித்துவரும் இந்த வீட்டிற்கு வந்தபின்பு அதிகமாகியது.அம்மாவின் விருப்பத்திற்கேற்ப கட்டப்பட்ட இந்த வீட்டில் செடிகள் வைப்பதற்கென்று அதிக இடம் விடப்பட்டது.
பள்ளி பருவத்திலிருந்த நானும்,அக்காவும் அருகிலிருந்த எல்லோர் வீடுகளிலுமிருந்து பல்வேறு செடிகளை கொண்டுவந்து அம்மாவிடம் தருவோம். விவசாய குடும்பதிலிருந்து வந்த அம்மாவிற்கு அவற்றை நடுவதும், பராமரிப்பதுவும் எளிதாக இருந்தது; ஆர்வமுடன் எங்களுக்கும் அவற்றை கற்றுத்தந்தார்.ஓரிரு ஆண்டுகளிலேயே வீட்டை சுற்றிலும் சிறிய தோட்டமாகவே மாறியிருந்தது..
வீட்டிலிருந்த பல்வேறு செடி, மரங்களிலும் வீட்டின் இடதுபின்புறமாக வைக்க பட்டிருந்த "மருதாணிச்செடி" எல்லோருடைய கவனத்தையும் ஈர்த்திருந்தது. எனது பாட்டியின் தோட்டத்திலிருந்து கொண்டுவந்து நடப்பட்ட அந்த மருதாணிச்செடி சிலவருடங்களிலேயே நன்கு வளர்ந்திருந்தது..
தனது பிறந்த வீட்டிலிருந்து கொண்டு வரப்பட்டிருந்ததால்,அம்மாவுக்கு மருதாணிச்செடியின் மீது தனி அக்கறையும்,பெருமையும் இருந்தது. புதிதாக வீட்டிற்கு வரும் உறவினர்களுக்கு மருதாணி இலைகளை பறித்து தருவதுடன், அது கொண்டுவந்து நடப்பட்ட சிறுகதையையும் கூறுவார்.
வாரவிடுமுறை நாட்களில் அக்காவின் தோழிகள் அனைவரும் சிறுமரமாகிவிட்டிருந்த மருதாணிமரத்தில் கூடி, இலைகளை பறித்து, அரைத்து ஒருவருக்கொருவர் இட்டுக்கொள்வதும் வாடிக்கையாகிவிட்டிருந்தது. மேல்நிலைவகுப்பிற்கு மாறியிருந்ததால் எனது பள்ளிதோழிகளும் மருதாணி இலைகளுக்கென வீட்டிற்கு வரத்துவங்கினர். (எனது தோழிகள் மீது அம்மாவிற்கு தனி அக்கறையுண்டு)
சமையலில் பிரசித்தி பெற்றிருந்த அம்மாவின் கைவண்ணம் மருதாணி அரைக்கும் பக்குவத்திலும் தேறியிருந்தது. மருதாணி இலையுடன் பாக்கு, புளி, தயிர் மற்றும் எலுமிச்சைசாறு முதலியவற்றை சரியான விகிதத்தில் கலந்து அரைக்கும் பணிகள் அம்மாவின் மேற்பார்வையில் நடக்கும் காட்சிகள், இன்றும் அழியாத சித்திரங்களாக மனதில் பதிந்துள்ளது.
கல்லூரி படிப்புக்கென அக்காவும், நானும் வெளியூர்களுக்கு சென்றுவிட்ட பின் மருதாணி மரத்துடனான அம்மாவின் உறவு மேலும் வலுவடைந்திருந்தது. தனது அன்றாட வீட்டு வேலைகளான துணிதுவைத்தல், பாத்திரங்களை தேய்த்தல் போன்றவற்றை மருதாணிமரத்தை சுற்றியே அமைத்துக்கொண்டார்.
மாலை ஓய்வுநேரங்களில் அண்டைவீட்டு தோழிகளுடன் பேசுவதும் மரத்தினடியில்தான் இருக்கும். அக்காவிற்கு திருமணம் நிச்சயம் செய்யப்பட்ட பின் வீட்டை விஸ்தரிப்பதற்க்காக சிலமரங்களை வெட்டிய போதும் மருதாணிமரத்தை வெட்ட அனுமதிக்கவில்லை.
இலையுதிர்காலங்களில் தனது இலைகளை வாசலெங்கும் உதிர்த்தும், வசந்தகாலங்களில் தனது இளமஞ்சள் நிற பூக்களின் மூலம் வீட்டிற்கு தனி வசீகரத்தை தந்தும்,,அம்மாவின் முக்கியதோழியாக மருதாணிமரம் ஆகிவிட்டிருந்தது...
.
அக்காவிற்கு திருமணம் முடிந்து மாமாவீட்டிற்கு சென்றுவிட்டபின்பு மருதாணியின் தேவையும் குறைந்துவிட்டது. நான்கு வயதுடைய அக்காவின் பெண்ணும் விடுமுறையில் எங்கள் வீட்டிற்கு வரும்போது மரத்தடியில் விளையாடுவதோடு சரி. இரண்டுநாட்களுக்கு முன்பு அம்மா மருதாணி அரைத்துக்கொண்டிருந்தார்.
யாருக்கும்மா மருதாணி அரைச்சிட்டு இருக்கீங்க?
பாப்பாவுக்குதா ஏன்?
அவ எங்கம்மா ஒரு மணிநேரம் ஒரே இடத்திலிருந்து வைச்சுக்குவாளா..?
பொண்ணுகளுக்கு புடிக்காத மருதாணியா..அதெல்லாம் வைசுக்குவா... என்று பேசிக்கொண்டிருந்தபோது பக்கத்துவீட்டு குழந்தைகளுடன் விளையாடிக்கொண்டிருந்த பாப்பா உள்ளே வந்தாள்..
என்ன அம்முச்சி இது?
இதுதா மருதாணி வா வைச்சுவிடரேன் ...என்றாள் அம்மா..
ஐயோ..அம்முச்சி இது மெஹந்தி இல்ல,,எங்கம்மா மெஹந்தி கோன்ல வைச்சிருக்காங்க...என்றபடி விளையாட ஓடிவிட்டாள்...
அம்மா ஏமாற்றத்தை வெளிக்காட்டாமல் என்னைப்பார்த்து அர்த்தத்துடன் சிரித்தாள்.
அம்மாவின் இதழ்களில் மருதாணியின் வண்ணம் புன்னகையாக சிவந்திருந்தது..
Share/Bookmark

Tuesday, August 4, 2009

''பலவீனத்தின் சாயல்''

"இந்த நூற்றாண்டு இந்தியாவின் நூற்றாண்டு'', இரண்டாவது முறையாக பிரதமராக பொறுப்பேற்றுள்ள மன்மோகன் சிங், தனது முதல் பாராளுமன்ற உரையில் இவ்வாறு கூறியபோது, காங்., உறுப்பினர்கள் மட்டுமல்லாமல் அனைத்து எதிர்க்கட்சி உறுப்பினர்களுக்கும் மேசையை தட்டி ஆரவாரம் செய்தனர்."பலவீனமான பிரதமர்' என்ற எதிர்க்கட்சிகளின் தாக்குதல், கூட்டணி கட்சிகளின் நெருக்கடி போன்ற தடைகளையும் மீறி நாட்டின் தனிப்பெரும் கட்சியாக உருவெடுத்துள்ள காங்., இந்தியாவை வல்லரசு நாடாக உருவாக்க சரியான பாதையில் இட்டுச்செல்லுமா?
வெளியுறவு கொள்கைகளில் தொடர்ந்து பல்வேறு பின்னடைவுகளை சந்தித்து வரும் மத்திய அரசு, உலக அரங்கில் இந்தியாவின் இடத்தை உறுதிப்படுத்த பல்வேறு தடைகளை எதிர்நோக்கி உள்ளது. நீண்ட காலமாக இந்தியாவின் நிரந்தர தலைவலியாக இருந்து வரும் பாகிஸ்தான் பிரச்னையில், இந்தியா தனது உறுதியான நிலைப்பாட்டை இன்னும் எடுக்காத நிலையில், நீர் சறுக்கு விளையாட்டுக்கு புகழ் பெற்ற நகரான "ஷார்ம்-யெல்-செய்க்'ல் நடந்த அணிசேரா நாடுகளின் மாநாட்டில் இந்தியா தனது வெளியுறவுக் கொள்கையில் மிகப்பெரும் சறுக்கலை எதிர்கொண்டது.
பாக்., பிரதமர் கிலானி, மன்மோகன்சிங் உடனான சந்திப்பின் போது, "பலுசிஸ்தான்' பிரதேசத்தில் இந்தியாவின் தலையீடு குறித்தும், இந்திய உளவுத்துறையின் நடவடிக்கைகள் குறித்தும் தனது கண்டனத்தை தெரிவித்து மன்மோகனுக்கு நெருக்கடியை ஏற்படுத்தினார். இந்தியா-பாக்., இணைந்து வெளியிட்ட கூட்டறிக்கையில் இடம்பெற்றிருந்த 'மிதமான போக்கு' இந்திய எதிர்க்கட்சிகளிடமும், அரசியல் வல்லுனர்களிடமும் பலத்த எதிர்ப்பை ஏற்படுத்தி, பாராளுமன்றத்தில் காங்.,கிற்கு மேலும் நெருக்கடியை தந்தது.
பொருளாதார ரீதியிலும், அரசியல் ரீதியாகவும், பல்வேறு பின்னடைவுகளை சந்தித்து வரும் பாகிஸ்தானிடம், இந்தியா தனது உறுதியான நிலையை வெளிப்படுத்த தவறி வருகிறது. இந்தியாவின் ஒருங்கிணைந்த பகுதியான காஷ்மீரில், 'ஜிகாத்' கோரிக்கை மூலம் தீவிரவாத நடவடிக்கைகளில் ஈடுபடும் பயங்கரவாத அமைப்புகள் மீது கடுமையான நடவடிக்கை எடுக்காத இந்திய அரசு, பாகிஸ்தானுடன் தொடர்ந்து 'அபத்தமான பேச்சுவார்த்தைகளையே' விரும்புகிறது.
ஆனால், தனக்கு சிறிதும் தொடர்பில்லாத அண்டை நாடான இலங்கையில் நடந்த, (நடக்கும்) உள்நாட்டு விடுதலைபோராட்டத்தில், சிங்கள இனவாத அரசுக்கு அனைத்து உதவிகளையும் செய்தது; தனது வெளியுறவு செயலாளர்களை சிங்கள ராணுவத்தின் 'மாதண்ட நாயகர்களாக' வும் ஈடுபடுத்தியது.
"இலங்கையில் நடக்கும் மனித உரிமைமீறல்களை பார்க்கும் போது, போரினால் பாதிக்கப்பட்ட அப்பாவி தமிழர்களுக்கு சரியான நிவாரணத்தை இன்றைய சிங்கள அரசு செய்யும் என்ற நம்பிக்கை இல்லை,'' என்று இலங்கையின் உச்சநீதிமன்ற தலைமை நீதிபதி, தனது பதவி விலகலின் போது கண்ணீருடன் கூறினார். அதன் பின்னரும், இலங்கை அரசுக்கு எதிராக ஐ.நா., சபையில் கொண்டு வரப்பட்ட தீர்மானத்தில், சிங்கள இனவாத அரசுக்கு ஆதரவை உறுதிப்படுத்திய இந்தியா தனது 'பேரினவாத முகத்தை' வெளிப்படுத்தியது.
தனது பழைய ராணுவ தளவாடங்களை பாகிஸ்தானில் விற்பதன் மூலம் "கல்லாவை' நிரப்பி வந்த அமெரிக்கா, தனது பார்வையை இந்தியா பக்கம் திருப்பியுள்ளது. இந்தியாவும் ஆமாம் சாமி போடுவதற்கு சீனாவின் அசுர வளர்ச்சி மீது கொண்டுள்ள பயமும் காரணம். இதுவரை இந்தியாவுக்கு எதிரான நடவடிக்கைகளை மறைமுகமாக மேற்கொண்ட சீனா, தற்போது வெளிப்படையாகவே களமிறங்கியுள்ளது. மேற்கத்திய நாடுகளுக்கு சவால் விடும் வேகத்தில் வளர்ந்து வரும் சீனா, எல்லைப்பிரச்னை உள்ளிட்ட ராஜ்ய ரீதியான தாக்குதல்கள் மட்டுமின்றி, பொருளாதார யுத்தம் மற்றும் மென்பொருள் யுத்தம் போன்றவற்றையும் இந்தியா மீது திணித்து வருகிறது.
'மேட் இன் சைனா' என்ற ஒற்றை வாக்கியம், இந்திய நுகர்வோர் சந்தையின் பெரும்பகுதியை தன் கட்டுப்பாட்டுக்குள் கொண்டு வந்துள்ளது. இந்தியாவை சுற்றியுள்ள நாடுகளுக்கு நிதிஉதவி, கட்டமைப்பு வசதி மற்றும் ராணுவ உதவிகள் மூலம் இந்தியாவின் அண்டைநாடுகளில் தனது கால்களை அழுத்தமாக ஊன்றியுள்ள சீனா, இந்தியாவின் முக்கிய பகுதிகள் தன் கண்காணிப்புக்குள் இருப்பதை உறுதி செய்துள்ளது.
ஆசியாவின் முக்கிய கடல் பிரதேசமான இலங்கையை தன் 'சொல் பேச்சு கேட்கும் பிள்ளை'யாக மாற்றி, தென் இந்தியாவில் உள்ள நீர்மின் உற்பத்தி நிலையங்கள், அணு உலைகள் மற்றும் ஆயுத தொழிற்சாலைகளை தனது கண்காணிப்பு வளையத்துக்குள் கொண்டு வந்துள்ளது.
நமது ராணுவவீரர்களை இழந்து நம்மால் சுதந்திரம் பெற்ற வங்கதேசம் அவ்வப்போது எல்லை பிரச்னை செய்து வருகிறது; தென்கடற்பகுதியில் தமிழக மீனவர்கள் சுடப்படுகின்றனர்; போதாக்குறைக்கு பாக்.,கும் தன் பங்குக்கு இந்திய மீனவர்களை கைது செய்கிறது; பல்வேறு நாடுகளிலும் இந்திய வம்சா வளியினர் மற்றும் வெளிநாடு வாழ் இந்தியர்கள் தொடர்ந்து தாக்குதலுக்கு உள்ளாகின்றனர். இவைகளில் கவனம் செலுத்தாத தற்போதைய மத்திய அரசு, தனது வெளியுறவுக் கொள்கைகளை அடகு வைத்து விட்டு, தேவையற்ற பிரச்னைகளில் ஈடுபடுத்திக் கொண்டிருக்கிறது.
உலகில் மிகப்பெரிய ஜனநாயக நாடு, உணவு உற்பத்தியிலும், ராணுவ ரீதியிலும் தன்னிறைவு பெற்ற நாடு; வீழ்ந்து வரும் உலக பொருளாதார சூழலிலும் சீரான வளர்ச்சி விகிதத்தை கொண்டுள்ள நாடு போன்ற பல்வேறு சிறப்புகளை பின்புலமாக கொண்டு உலக அரங்கில் தனது உறுதியான நிலைப்பாட்டை எதிரொலிக்க தவறு வரும் இந்தியா, தனது முதுகெலும்பு இல்லாத வெளியுறவு கொள்கைகளால் தேசத்தை தலை குனிய வைத்துள்ளது.
Share/Bookmark

Friday, July 24, 2009

கவிதைகள்...

நேர்படபேசு...

எப்படி மிகச்சரியாக

யூகிக்க முடிகிறது, உங்களால்...


என் பதில்களுக்கான

கேள்விகளை?

என்னால் ஒரு போதும்

யூகிக்க முடிவதில்லை

உங்கள் கேள்விகளுக்கான

பதில்களை!


மார்கழி 6, மாலை 5.40-6.30

மூலவர்,

உற்சவர்,

உடனுறையம்மன்,

பரிவார தெய்வங்கள் ..

தேவதையாய் நீ !

இணைந்து நிகழ்த்தியது


இந்த "தேவகணம்' !


கானல்

அருவியென பொங்குகிறது

உன் நினைவுகளும்,

நினைவுசார் கனவுகளும்...


'விக்கிக்கொண்டே இருக்கிறது மனம் !'

அள்ளி பருகவா முடியும்

கானலின் அருவியை...
Share/Bookmark