Sunday, January 24, 2010

கனவில் வந்த சிறகு.

பறவையின் வானம்
சிறகுகளில் துவங்கியது.
வானத்தை வசப்படுத்திய
செம்பழுப்பு சிறகுகள்
உயரங்களின் களைப்பில்
உதிரத் துவங்கியது (ம்)
'அக'த்துள் அடங்கியது
பறவையின் வானம்.


உயிர் பிழைத்தல் வேண்டி
சிறகுகள் பட,படக்க
பயம் வழியும் பார்வையில்
கருணையை வேண்டுகிறது
ஒற்றைப் புறா..
லாவகமாய் தூக்கிச்செல்லும்
பருந்தின் நாசியில்
நிதானமாய் நிரம்புகிறது
பச்சை ரத்தத்தின் வாசம்.


கனவினில் வந்த
பறவையின் இறக்கையிலிருந்து
விழுந்தது சிறகொன்று..
காற்றின் தடங்களில்
மிதந்த ஒற்றைச்சிறகை
கைக்கொள்ள கனவுவெளிகளில்
அலைந்து திரிந்தேன்
சிறகின் மென்மையை
உணரும் முன்னமே
கலைந்து விடிந்தது இரவு
.
Share/Bookmark

0 comments:

Post a Comment