Tuesday, March 29, 2011

மின்னொளிர் முத்தங்கள்


ஒவ்வொருமுறை சந்திக்கும் போதும்
ஒரு சண்டை துவங்கி, முடியும்
நம்முள், இன்று வழக்கம் தவறிய
மாலை நேரத்துச் சந்திப்பு
இருள் பெரும் விருட்சமெனப் பரவி
வியாபிக்கத் துவங்கியிருந்தது
செவ்வடர் கீழ்வானில் தெறித்த
தீக்குழம்பின் சிறு தீற்றல்களாய்
மினுக்கத் துவங்கின நட்சத்திரங்கள்.
ரகசிய முத்தங்களளவு பிணையா நம்
நேசத்தை எண்ணி உனக்கான ரகசிய
புன்னகையுடன் காத்திருந்தேன்.
வானம் வெட்கமிகுந்து கறுப்பாடை
பூணத்துவங்கையில் நீ வந்தாய்
ஒரு கேள்வியுடன்,
மொத்த நட்சத்திரங்கள் எத்தனை?
நட்சத்திரங்களை பூக்களாய் சூடியிருக்கும்
தேவதையிடமிருந்து நட்சத்திரக் கேள்வி.
''ஒவ்வொரு காதலனும் தன் காதலியை
முத்தமிடுகையில் முத்ததிற்கொன்றாய்
நட்சத்திரம் பிறக்குமாம்'' , என்று
புதிய நட்சத்திரங்களுக்கான விதைகளை
தூவினேன், கார் இருண்டால் மழை
பொழியும் என்ற நன்னம்பிக்கையில்
விழி நட்சத்திரங்களில் செல்லக்கோபம்
தெறிக்க எதிர்க்கேள்வி விதைத்தாய் நீ
எரிகல்லாய் விழும் நட்சத்திரங்கள்
எதில் சேர்த்தி?
அது,''காதலி ஒவ்வொருமுறை காதலனுடன்
சண்டையிடும் போதும் ஒவ்வொன்றாய்
பூமியில் விழுந்து மரிக்கிறது'' என்று
சோகம் கூட்டினேன் , ' நீ எத்தனை
முறை என்னுடன் சண்டையிட்டு
நட்சத்திரப்பலி கொடுத்திருக்கிறாய் தெரியுமா',
என்று நட்சத்திரங்களுக்கு இரங்கல் வாசித்தேன்
''ரொம்ப கவலைப்படாதீங்க,கணக்கு சரியாகாம
போயிடுமா, இல்ல போகத்தான் விட்டுடுவீங்களா''
என்று உனக்கு மட்டுமே கேட்குமளவில்
சொல்லிவிட்டு புன்னகைத்தாய்.
இருவரது கடிகாரங்களிலும் நொடி முள்
சிறகிழந்து தவித்துக்கொண்டிருந்தது
வழக்கமாக விடைபெற ஆயத்தமாகும் முன்
என் உள்ளங்கைகளில் சில கோலங்களை
தீட்டுவாய்..புள்ளிகளற்ற நெளிக்கோலம்
கோலமிடத் துவங்கிய உன் கைகளை
இறுகப் பற்றிக்கொண்டு, சட்டென
உன் கன்னக்கதுப்புகளில் என் இதழ்களை
சில நொடிகள் நிறுவினேன்..நம்
சார்பில் முதல் முத்த நட்சத்திரம்.
விடுக்கென்று கைகைளை
உதறியெழுந்து பொய்க்கோபத்துடன்
என் தோள்களில் குத்தினாய், அடுத்த
சண்டை துவங்கியது நம்முள்..
மையிருள் வான் கிழித்த நட்சத்திரமொன்று
நம்மருகே ஒளிர்ந்து விழுந்து மறித்தது
எரிகல்லாய்..இருவரும் ஒருசேர
புன்னகைத்து அமைதியானோம்
கணக்குகள் சரியாவது காலத்தின் நியதி.


Share/Bookmark

6 comments:

முரளிகுமார் பத்மநாபன் said...

கலாப காதலா..... கலக்கல்ஸ் :-)

திருநாவுக்கரசு பழனிசாமி said...

நன்றி முரளி.

குட்டிப்பையா|Kutipaiya said...

லவ்லி லவ்லி!!!

திருநாவுக்கரசு பழனிசாமி said...

நன்றி சீதா.

maniamudham said...

Suuupppeeerrrr!!!!!

Abi inba said...

Excellent :)

Post a Comment